Iha Sesta-feira, loron 31 fulan-Maiu 2024, Prezidente Komisaun Nasional Desportu (KND), Ministru Juventude, Desportu, Arte no Kultura, Sr. Nelyo Isaac Sarmento, prezide plenaria ordinaria ba daruak KND ne’ebé hala’o iha Sala Enkontru Magna Ministeriu Juventude, Desportu, Arte no Kultura. Plenaria ne’e konta ho partisipasaun husi Komisariu no funsionáriu sira husi NSC, hodi diskute proposta Dekretu-Lei kona-ba estabelesimentu Organizasaun Nasional Anti-Doping (NADO) iha Timor-Leste.
Durante plenaria ne’e, Sekretariu Ezekutivu KND aprezenta esbosu Dekretu-Lei no Komisariu sira husu tempu atu lee didi’ak dokumentu ne’e molok halo revizaun hodi ba aprezenta iha Konsellu Ministrus atu hetan aprovasaun. Tanba ne’e la iha desizaun finál kona-ba Dekretu-Lei NADO nian iha momentu ne’e.
Iha tinan 2018, atleta Paralimpiku, Sr. Teofilo Freitas, rejistu record tempu ba kategoria T37 iha dixiplina 400m iha ASEAN Para Games iha Jakarta, Indonesia, ne’ebe ikus mai anula tiha. Ho ida ne’e, KND deside atu hein Komisaun Nasional Paralimpiku Timor-Leste (CPNTL) atu husu klarifikasaun husi Komisaun Internasional Paralimpiku (IPC) molok halo atribuisaun ba prémiu tuir mai. Desizaun atu atribui premiu ba atleta Paralimpiku hanesan, ne’ebe hetan record tempu ba kategoria T38 iha 1500m iha Asian Para Games 2023 iha Hangzhou, Xina, KND sei deside kona-ba valor premiu bazeia ba klarifikasaun husi IPC.
KND mos prepara hela lista finál kona-ba atleta sira ne’ebé sei kompete iha Jogus Olimpikus no Paralimpikus iha Paris, Fransa. Agora dadaun, atleta balun kontinua partisipa iha eventu pre-kualifikasaun.
Kompromisu KND nian atu estabelese NADO no asegura rekoñesimentu ne’ebé justu ba atleta sira-nia susesu hatudu ninia dedikasaun atu mantein integridade desportu iha Timor-Leste.
